Барлық ата-ана мектептегі жиналыстарға баруды ұната бермейді. Бұл – факт. Әрі, өкінішті факт. Ал шын мәнінде, педагогтер ата-аналарға өте пайдалы ақпарат жеткізуге тырысады.
Мәселен, Жангелдин ауданындағы А.Байтұрсынов атындағы мектепте 5–11 сынып оқушыларының ата-аналарымен аутодеструктивті мінез-құлықтың, буллингтің және тұрмыстық зорлық-зомбылықтың алдын алу тақырыптары талқыланды.
Бұл – бүгінгі күні өте өзекті әрі алаңдатарлық мәселелер. «Бұрын да балалар ұрысып, тіпті төбелесіп қалатын, ештеңе етпейтін, керісінше батыл болып өсті» деген пікірлерді жиі естиміз. Алайда жай ұрыс пен буллинг – мүлде екі бөлек нәрсе!
Осындай кездесулерде педагогтер дәл осы жайттарға назар аударады. Ересектердің хабардарлығын арттыру және мүмкіндігінше «жағымсыз салдардың алдын алу үшін» алаңдататын белгілерді ерте анықтау мақсат етіледі. Бұл – отбасыларға көрсетілетін психологиялық қолдау туралы.
Бүгінде мектептегі ата-аналар жиналыстарында тек түсіндіру жұмыстары ғана емес, психологиялық тренингтер де өткізіледі. А.Байтұрсынов атындағы мектепте ата-аналарға «Ата-ана болу – бұл…», «Қолдау қолы», «Егер де…» сияқты жаттығулар ұсынылды. Бұл олардың қалыптасқан тәрбие беру стилін оң бағытта өзгертуге көмектеседі деп үміттенемін!