Арқалық қаласындағы №10 жалпы білім беретін мектепте мектептің Психологиялық қызметі мен біздің Орталықтың «Отбасылық клуб» атты облыстық жобасы аясында «Ата-ана мен бала арасындағы қарым-қатынас» тақырыбында маңызды да жылы кездесу өтті.
Іс-шараның мақсаты – отбасындағы сенімді нығайту, балалармен тиімді қарым-қатынас жасау дағдыларын дамыту және олардың эмоциялық қажеттіліктерін түсіну болды.
Ата-аналар «Мен қандай ата-анамын?» және «Бала тәрбиесінде қандай қиындықтарға тап боламын?» деген сұрақтарға қызығушылықпен жауап берді. Бірлескен пікір алмасу әрқайсысына өзінің ата-аналық стилі жайында ойланып, даму жолдарын табуға көмектесті.
Кездесудің негізгі бөлігіне күрделі отбасылық жағдайларды талдауға арналған жағдаяттық тапсырмалар кірді. Қатысушылар бұл сәттерде өз тәжірибелерімен бөлісіп, пайдалы шешімдер ұсынды – бұл шынайы тәжірибе алмасуға айналды!
Кездесу соңында сенімді қарым-қатынасты нығайтуға және өзара түсіністікті арттыруға бағытталған психологиялық тренинг өткізілді. Ата-аналар белсенділік танытып, «сұрақ-жауап» сессиясы арқылы өздерін мазалаған мәселелерді талқылап, қолдау алды.
Осындай маңызды кездесулерге қатысушылардың ашықтығы қуантады – олар педагог-психологтармен бірлесіп жылы атмосфера қалыптастырып, ең бастысы – балаларына деген қарым-қатынасты одан әрі жақсартуға талпынуда.
Әр отбасыда сенім, қолдау мен махаббат үнемі орнап тұрсын!