«Қазақстан – ортақ үйіміз» атты патриоттық және отбасылық тәрбие беру бойынша облыстық жоба аясында Науырзым ауданының Дәмді жалпы білім беретін орта мектебінде «Менің жеке қауіпсіздігім» тақырыбында бірқатар сабақтар өткізілді. Оларды педагог-психолог Л.М. Айдарбекова сынып жетекшілерімен бірлесіп ұйымдастырды.
Мақсаты – оқушылардың жеке қауіпсіздікке және айналасындағы адамдардың қауіпсіздігіне саналы әрі жауапкершілікпен қарау дағдыларын қалыптастыру.
Оқушылар қауіпсіз мінез-құлық дағдыларын дамытуға бағытталған әртүрлі жаттығулар орындады. Сабақ басында балалар бір-бірін құшақтап қарсы алып, сенімді атмосфера қалыптастырды. Кейін «Миға жаттығу», «Бейтаныс адам», «Үйде жалғыз қалсаң» және «Телефон қоңырауы» атты ойындарға қатысты. Бұл ойындар оқушылардың күнделікті өмірде мұқият болудың маңыздылығын түсінуіне мүмкіндік берді. Сабақ барысында «қауіп» және «қауіпсіздік» ұғымдары да түсіндірілді.
Оқушылар барлық жаттығуларға белсенді қатысып, жеке қауіпсіздік мәселелеріне қызығушылық танытты. Сабақ соңында рефлексия өткізіліп, балаларға төтенше қызметтердің байланыс нөмірлері берілді.