Жақында Науырзым ауданының Докучаев жалпы орта мектебінде 9-11 сынып оқушыларына темекі тартудың, вейптердің, алкоголь мен есірткі заттарын пайдаланудың зияны туралы түсіндіру жұмыстары жүргізілді.
Бұл маңызды кездесу мектептің психологиялық қызметі мен «Психобелсенді заттарды қолданудың алдын алу», «Қазақстан – ортақ үйіміз» жобалары аясында ұйымдастырылды. Мақсаты – жоғары сынып оқушыларының денсаулығын сақтау.
Педагог-психолог А.А. Хамзина жасөспірімдерге есірткіге байланысты мәселелер туралы толық ақпарат беруді, сондай-ақ психобелсенді заттарды қолданудың алдын алуға көмектесетін дағдыларды дамыту міндетін қойды.
Жасөспірімдік кезең – балалардың ересек болуға ұмтылып, өзін еркін ұстауға, қоғамда құпталмайтын немесе мүлдем тыйым салынған нәрселерге қызығушылық танытатын уақыты. Дәл осы кезеңде біз, ересектер, оларға дұрыс бағыт-бағдар беруіміз керек, оларды жат әрекеттерден қорғауымыз қажет.
Осындай ашық әңгімелер жүргізіліп, пайдалы кеңестер айтылатын кездесулер оқу орындарында жиі өткізілуі тиіс деп санаймын.