Сарыкөл ауданына қарасты Краснодон орта мектебінде ата-аналарға баламен қарым-қатынасты жақсарту жолдары үйретілді. Сондай-ақ тренингтің мақсаты – ұжымды біріктіру болды. Іс-шара облыстық «Отбасылық клуб» жобасы аясында ұйымдастырылды.
Педагог-психолог тарапынан келесі бағыттағы жаттығулар өткізілді: қолайлы психологиялық ахуал қалыптастыруға арналған («Күлімде»), өзін-өзі талдау дағдыларын дамытуға бағытталған («Сөйлемді аяқта») және басқа да тапсырмалар.
Мұндай іс-шаралардың құндылығы – тек маңызды әрі дайын ақпаратты алу ғана емес, сонымен қатар бірлесіп әңгімелесуге, ортақ тақырыпта ой бөлісуге мүмкіндік беруінде. Өйткені күнделікті қарбаласта бұған әрдайым уақыт табыла бермейді!
Жақсы қарым-қатынас ата-аналар үшін де, балалар үшін де маңызды, ал тәрбиенің тиімділігі – өзара сенім мен құрмет болғанда артады. Сондықтан отбасылық бақыт – ортақ еңбектің нәтижесі!