Осындай тренинг Жангелдин ауданы А. Нурманов атындағы орта мектебінің 9-сынып оқушыларына арнап ұйымдастырылды. Оны мектептің психолог маманы Ж.Ғ.Сарманова облыстық «Қазақстан – ортақ үйіміз» жобасы және мектептің психологиялық қызметі аясында өткізді.
Тренингтің мақсаты – сыныптағы оқушылардың бір-біріне деген достық қарым-қатынасын нығайту, ұжымдық бірлікті дамыту және тапсырмаларды бірге орындау қабілетін арттыру.
«Қыздыру» жаттығуы кезінде оқушылар белсенділік танытып, нағыз команда ретінде әрекет етті. Бірлескен жұмыс барысында олардың көңіл-күйлері де айтарлықтай жақсарды!
Осындай бағыттағы іс-шаралар қазіргі таңда ауадай қажет. Неліктен? Бұл сұраққа әрқайсыңыз өзіңіз де жауап бере аласыз деп ойлаймыз.
Әр адам өмірінің көп бөлігін ұжымда өткізеді: мектепте, жұмыста, отбасында. Иә, отбасы да – бір ұжым! Ал кез келген ұжымда өзін жайлы сезіну үшін ортақ тіл табыса білу, ымыраға келу және бірлесіп жұмыс істеу маңызды.
Мұғалімнің рөлі – бірлесіп еңбек етудің маңызын көрсету, істі орта жолда тастап кетудің дұрыс еместігін түсіндіру және достарын қиын жағдайда тастамау керектігін үйрету. Мықты достық, қарым-қатынас жасай білу және ұжымда жұмыс істеу – өмірді әлдеқайда мағыналы, қызықты әрі жеңіл етеді!