Сарыкөл ауданы Весело-Подольск жалпы білім беретін мектебінде «Әке – бала бақытының көзі» атты мазмұнды сабақ өтті. Іс-шара мектептің педагог-психологының бастамасымен «Отбасылық клуб» жобасы аясында ұйымдастырылды.
Кездесудің басты мақсаты – ата-аналарға баланың өміріндегі әкенің рөлін терең ұғындыру: ол – тірек, қорған, шексіз махаббат пен сенімділіктің қайнар көзі.
Іс-шара барысында:
«Позиция» жаттығуында әкенің шынайы беделі неден көрінетінін, ал агрессияның сенімге қалай зиян тигізетінін талқылады.
«Қайта айт» ойыны арқылы ата-аналар дөрекі сөздерді құрмет пен қолдауға толы жылы сөздерге ауыстыруды үйренді.
«Балаға қандай әке қажет?» атты ойталқы кезінде мейірімділік, жауапкершілік, сабырлылық пен тыңдай білу сияқты қасиеттер аталды.
Топтық жұмыста ата-аналар баламен жылы әрі сыйластыққа негізделген қарым-қатынас орнатудың жолдарын іздеді.
Ерекше әсер еткен сәт – оқушылардың өз әкелері туралы жазған шығармаларын оқу болды. Балалардың жүрекжарды сөздері ата-аналарға жай ғана ата-ана емес, нағыз дос әрі үлгі болудың маңызын еске салды.
Соңында бейнеролик көрсетіліп, қатысушылар өз әсерлерімен, әкелік туралы мақал-мәтелдермен және бір-біріне ізгі тілектерімен бөлісті.
Бұл сабақ саналы әрі мейірімді әке болуға жасалған бір қадам болды. Ол ата-аналарды оң өзгерістерге және отбасылық байланыстарды нығайтуға шабыттандырды деп сенеміз.