БАРШАҢЫЗДЫ 1 МАУСЫМ – ХАЛЫҚАРАЛЫҚ БАЛАЛАРДЫ ҚОРҒАУ КҮНІМЕН ҚҰТТЫҚТАЙМЫН!
Бұл тамаша мереке әрдайым ерекше қуаныш пен жылылыққа толы. Себебі балалар – біздің ең қымбат, ең асыл қазынамыз! Балалар – бақыттың символы!
Біз, ересектер, болашағымызды балалармен байланыстырамыз, ал қазіргі өмірімізді оларсыз елестете алмаймыз. Сондықтан олар бейбіт әрі бақуатты ортада өсіп-жетілуі үшін қолдан келгеннің бәрін жасау – біздің ортақ міндетіміз
Баланың ең сенімді қорғаны – бұл дені сау, тату және әл-ауқаты жақсы отбасы. Мемлекет те отбасылар мен отбасылық құндылықтарды нығайтуға, ана мен баланы қорғауға үлкен көңіл бөліп келеді.
Қазіргі заманғы мектептер мен балабақшалар бой көтеріп, онда балаларға қазіргі уақытта «Адал азамат» деп аталатын тұтас тәрбиелеу мемлекеттік бағдарламасы аясында негізгі құндылықтар сіңірілуде.
Балалардың жан-жақты дамуына арналған инновациялық орталықтар, оқушылар сарайлары, спорт алаңдары ашылуда. Түрлі балалар ұйымдары олардың өңір өміріне белсенді араласуына мүмкіндік беріп отыр.
Әрбір бала дені сау болып, ата-анасының қамқорлығына бөленіп өссін дегім келеді. Аспанымыз әрдайым ашық, әр күніміз мейірім мен қызыққа толы болғай! Ата-аналарға – сабыр, мейірім мен жұмсақтық тілеймін. Мерекелеріңізбен, достар!
