Қазіргі заманда балалар стресс, түсінбеушілік пен жанжалдарға жиі кезігеді. Сондықтан бүгінде тек мінез-құлық ережелерін ғана емес, бір-біріне тірек болуды үйрететін бағдарламалардың маңызы ерекше.
Әулиекөл ауданы Қазанбасы №2 мектебінде педагог-психолог Г.З. Брахметова өткізген «DosbolLIKE» ұлттық бағдарламасы аясындағы сабақтар – осындай жұмыстың жарқын үлгісі болды.
Ойын және командалық жаттығулар арқылы балалар бір-бірін тыңдауды, келісуді және айырмашылықтарды қабылдауды үйренді. Осындай ортада әрбір бала өзін бағалаудың нысаны емес, топтың маңызды мүшесі ретінде сезіне алды. Мұнда «кім мықты?» дегеннен гөрі, «біз қалай әрекеттесеміз?» деген сұрақ маңызды болды
Агрессияның алдын алу қарапайым нәрселерден басталады – сыйластыққа негізделген қарым-қатынас, эмоцияларды дұрыс жеткізе білу және көмек сұрай алу.
Балалар қақтығыстарды бейбіт жолмен шешуді үйренгенде, олардың бойында ішкі сенімділік пен қауіпсіздік сезімі қалыптасады. Ал достыққа толы орта – зорлық-зомбылық пен оқшауланудың ең тиімді алдын алу жолы!